1 Corinthians 1

1Wasika ye gmi n Bulus aba nu, n Shekwoyi ɓei yiwo ntuge wa ze aza tnu-tnu yi Yesu Kristi nya, ɓedo n ʼyi zado yi na yiwo ge Sastanisu nyi. 2Kwoi lo Shekwoyi aza ʼba n Korinto, n Shekwoyi wa yiɓa ɓa ze Wa za, Woi la ɓa gwo dna n Yesu Kristi mi. Kwa lo aza ba vinya njesun nɓa yi Yesu Kristi, eyi Dagayi nɓa nya yi.

3Shekwoyi eyi Dada ɓedo n ʼyi Dagayi Yesu Kristi yi, wo ga fye alheri n bugba fuyi.

Shekwoyi Anabarka, Fye Bwa Jedoɓe

4Mi zhin ma sa Shekwoyi ami cici ntu alheri manayi ɓo n wa ga fye she fye ku ze Yesu aza nyi. 5Wo ku fye ze anyabwayi n mwa. Wo ku bma fye zhin fyei da ɓo ga Wo, Woi la yekpe nunuyi ga fye dna gaiciya. 6Nya mi ɓei gna fye ge Kristi ɓo mi Wa zhin ga fye, kwo ku zhin. 7Fye la alheri doho-dohoi bwa nna anabarka yi n sayi; zafun nyaga doho-dohoi n iko yi fya zhin Wo ɓeye, ɓa zhin fye nya nu dna saye n na zhi ai pmi eyi Dagayi Yesu Kristi Jezeɓe nyi. 8Wo la ye har nyalonyalo ayi fye aza kni-kni-yi, tna laifi n ɓenukwoi yi dna Wo nyipyei jezezhi nya. 9Shekwoyi ɓa zhin fye ɓeye ntna kma-kma, ntuge Wo zhin Wa zhin ɓo Wa da cim-cim. Owoi nu na yi fye ge fya zhin nugundo nwo nugun yi Yesu Kristi.

10Ama, oma-zaje, mi gyi fye wye dna Dagayi Yesu Kristi ʼye, fye ku ɓeda ajegna nya ya nfya tasin. Fye ku ze gmanyi, to ajegna lo aduwa nyakun m. Fye la ye ɓedo, efye ɓo nubo-zhin gmanyi, ɓemwi gmanyi njesun. 11Ntuge, omazaje, azaho n ɓa kun n Kuluwi Puwa ɓa ku gnami pei-pei nge fye wu anya lo n najeyi. 12Ntuge azaho cige, “Mi zhin Bulus nya nu” Azaho cige, “Mi zhin Bitrus nya nu.” Azaho cige, “Mi zhin Bitrus nya nu.” Aza ho ge, “Mi zhin Apollos nya nu.” Azaho kwa ɓai cige, “Mi zhin Yesu nya nu.”

13Fyela Yesu gnajeya wyiwo-wyiwo. Omi, Bulus, nu ɓei fi ntu fya laifi ɓo? A ɓei zhin fye batisma dna n Bulus eyenu? 14Ma gode n Shekwoyi ntuge mi to ɓei zhin zaho batisma n fye m akpege Krisbus ɓedo n Gayus 15Ntuce nu zaho-zaho yi ta mi wa cige gye mi ya oɓo woyi mi-i shi “Bulus aduwa nyakun m.” 16E, kuwa, mi ɓei ku batisma zhin Istifanus a puwa da ama mi ta shan zaho ɓo palon n mi ɓei zhin wo batisma m. 17Yesu to ɓei tnumi ma zhin batisma num, ama ma zhin waʼazi Nabari Manayi nya. Mi to zhin waʼazi n na ɓeda ayakwoi fi aza ɓeyekpe nyam, kada ko wun iko ya n ko dna n waʼazi fa-fayi Yesu zundu nya nyi.

18Gama Yesu fi-fi ti zundu nabari ko zhin gbolo-yi nu n aza bwi-bwi-yi aba. Ama n eyi aza gni-gni-yi aba, ko zhin Shekwoyi iko nu. 19Ntuge Shekwoyi wa cige, “miɓa ze aza zokwo gni-gni nya gboloyi, kwo ko ɓei bmiya n ɓa ba wuna, har ɓeda n na ɓo nubo-zhin a ɓeyekpei agbamgbam nya yi.”

20To mi gye awyega da, aɓeyekpei n naza yi n ɓa mi n gbegyi tu na anyi nya tukwo nyi. Shekwoyi ku ɓa ze amama da, woi ku wu ge oɓa wyega zhin gboloyi nu. 21Gama Shekwoyi dna n wa wyega, wa ku kpe ge anyi ta kpe wo ye dna naza wyegam. Amma wa zhin ntuge wa gni aza dna n waʼazi zhin mi, n nanyi gye ko ge gboloyi nyi. 22Ko ze gboloyi nu na Yahudiyi aba ntuge ɓa ye tuze n ʼshe kwa wu ge oɓo na zhin ko waʼazi nyi, ko zhin gaiciya nu, kwoi ze gboloyi nu n na Heleniyi aba, ntuge ɓa bwa nya gaiciya nu ga n ko lodo nɓa ɓonubo-zhin yi, nɓa wyega yi jesun. 23Ntu cenu sa ya zhin waʼazi ge Yesu wa fi Wa gni ɓa nu, Ayahudiyi ta ye ɓedayem ko fyewyi. N na Heleniyi aba kwa, ko zhin gboloyi nu. 24Ama Shekwoyi la awye gu aza ya, na yi ɓa ga gni-gni nyi, a Yahudiyi dnado na Heleniyi yi, ɓa gye she Kristi nu zhin Shekwoyi iko kala Wa gni ɓa; Kristi n Wohin tukwo Wonu dna n Shekwoyi shiri ceceyi nya atasin, ntu ɓa gni-gni ɓo. 25Gama Shekwoyi shiri ye na gye ko ge gboloyi nyi, ko du zanyikoci awyega lo n ceceyi. Shekwoyi a-kala-gba kuwa–Kristi fi-fi tu n zundu–ko du zanyikoci doho-dohoi lo n kala.

26To ema zaje, fye dnawye n fya tasin fya gye, aza fyewyi nu bwasun nfye mi nfye vi Kristi nyi n ʼnaye dnagmai yi, ko iko, ko kuwa n duciya yi.

27Gama Shekwoyi ɓei kni aza gbolo n zanyikoci awye ntuge wa dna aza ce-ce vinyiko. Njesun wa kni aza gba-gba yi ntuge wa dna akalada vinyiko. 28Wa kni shiri n ʼnanyi ye ta gyeko ngye nya hom, ntuge wa ze anya gboloyi n nanyi ye gye ngye ɓa nu zhin anya dnagmayi. 29N nabai ge ko knibwai na, to zaho-zahoyi wami wa gma gni n Shekwoyi abyem.

30Ntuge n Shekwoyi aba nu gmanyi nfye wye-wyei yi lo dna Kristi Yesu. Owo na wuyi Shekwoyi shiri ntu gni-gni ɓo; Owo na zhin Shekwoyi Woi gwo yi: Owo na ze yi aza Gyi-gyi-yi, Wona ga Wohin tukwo Wa gni yi. 31Ai littafi Gyi-gyi-yi ku da ge, “Zaho-zaho yi wo cei pma wa gma, to wo gma dna n ʼnya Dagayi ku zhin.”